భైరవ స్తవః (Bharava Stavah in Telugu)

భైరవ స్తవః (Bharava Stavah in Telugu)

వ్యాప్తచరాచరభావవిశేషం చిన్మయమేకమనంతమనాదిం . 

భైరవనాథమనాథశరణ్యం త్వన్మయచిత్తతయా హృది వందే .. 1..

 

త్వన్మయమేతదశేషమిదానీం భాతి మమ త్వదనుగ్రహశక్త్యా .

త్వం చ మహేశ సదైవ మమాత్మా స్వాత్మమయం మమ తేన సమస్తం .. 2..

 

స్వాత్మని విశ్వగతే త్వయి నాథే తేన న సంసృతిభీతికథాస్తి . (సంసృతిభీతికథాఽస్తి)

సత్స్వపి దుర్ధరదుఃఖవిమోహత్రాసవిధాయిషు కర్మగణేషు .. 3..

 

అంతక మాం ప్రతి మా దృశమేనాం క్రోధకరాలతమాం వినిధేహి .

శంకరసేవనచింతనధీరో భీషణభైరవశక్తిమయోఽస్మి .. 4..

 

ఇత్థముపోఢభవన్మయసంవిద్దీధితిదారితభూరితమిస్రః .

మృత్యుయమాంతకకర్మపిశాచైర్నాథ నమోఽస్తు న జాతు బిభేమి .. 5..

 

ప్రోదితసత్యవిబోధమరీచిః ప్రేక్షితవిశ్వపదార్థసతత్త్వః .

(ప్రోదితసత్యవిబోధమరీచిప్రేక్షితవిశ్వపదార్థసతత్త్వః .)

భావపరామృతనిర్భరపూర్ణే త్వయ్యహమాత్మని నిర్వృతిమేమి .. 6..

 

మానసగోచరమేతి యదైవ క్లేశదశా తనుతాపవిధాత్రీ .

(క్లేశదశాఽతనుతాపవిధాత్రీ, క్లేశదశా తనుతామవిధాయ)

నాథ తదైవ మమ త్వదభేదస్తోత్రపరామృతవృష్టిరుదేతి .. 7..

 

శంకర సత్యమిదం వ్రతదానస్నానతపో భవతాపవిదారి .

తావకశాస్త్రపరామృతచింతా స్యందతి చేతసి నిర్వృతిధారాం .. 8..

 

నృత్యతి గాయతి హృష్యతి గాఢం సంవిదియం మమ భైరవనాథ .

త్వాం ప్రియమాప్య సుదర్శనమేకం దుర్లభమన్యజనైః సమయజ్ఞం .. 9..

 

వసురసపౌషే కృష్ణదశమ్యామభినవగుప్తః స్తవమిమమకరోత్ .

యేన విభుర్భవమరుసంతాపం శమయతి (స్వ)జనస్య ఝటితి దయాలుః .. 10..

 

(పౌషరసాష్టగకృష్ణదశమ్యామభినవగుప్తః స్తవమిమకరోత్ .

యేన విభుర్భవమరుసంతాపం నాశయతి స్వజనస్య ఝటితి దయాలుః .. 10..)

 

.. ఇతి శ్రీఅభినవగుప్తపాదాచార్యకృతః భైరవస్తవః సంపూర్ణః .