శ్రీ విష్ణు సారస్వత స్తోత్రం
బ్రాహ్మణ ఉవాచ
శ్రూయతాం తవ యచ్ఛ్రేయస్తథాన్యేషాం చ పాపినామ్ ।
సమస్తపాపశుద్ధ్యర్థం పుణ్యోపచయదం చ యత్ ॥ 59.64 ॥ప్రాతరుత్థాయ జప్తవ్యం మధ్యాహ్నేఽహ్నక్షయేఽపి వా । అసంశయం సదా జప్యం జపతాం పుష్టిశాంతిదమ్ ॥ 59.65 ॥
ఓం హరిం కృష్ణం హృషీకేశం వాసుదేవం జనార్దనమ్ । ప్రణతోఽస్మి జగన్నాథం స మే పాపం వ్యపోహతు ॥ 59.66 ॥
చరాచరగురుం నాథం గోవిందం శేషశాయినమ్ । ప్రణతోఽస్మి పరం దేవం స మే పాపం వ్యపోహతు ॥ 59.67 ॥
శంఖినం చక్రిణం శార్ఙ్గధారిణం స్రగ్ధరం పరమ్ । ప్రణతోఽస్మి పతిం లక్ష్మ్యాః స మే పాపం వ్యపోహతు ॥ 59.68 ॥
దామోదరముదారాక్షం పుండరీకాక్షమచ్యుతమ్ । ప్రణతోఽస్మి స్తుతం స్తుత్యైః స మే పాపం వ్యపోహతు ॥ 59.69 ॥
నారాయణం నరం శౌరిం మాధవం మధుసూదనమ్ । ప్రణతోఽస్మి ధరాధారం స మే పాపం వ్యపోహతు ॥ 59.70 ॥
కేశవం చంద్రసూర్యాక్షం కంసకేశినిషూదనమ్ । ప్రణతోఽస్మి మహాబాహుం స మే పాపం వ్యపోహతు ॥ 59.71 ॥
శ్రీవత్సవక్షసం శ్రీశం శ్రీధరం శ్రీనికేతనమ్ । ప్రణతోఽస్మి శ్రియః కాంతం స మే పాపం వ్యపోహతు ॥ 59.72 ॥
యమీశం సర్వభూతానాం ధ్యాయంతి యతయోఽక్షరమ్ । వాసుదేవమనిర్దేశ్యం తమస్మి శరణం గతః ॥ 59.73 ॥
సమస్తాలంబనేభ్యో యం వ్యావృత్త్య మనసో గతిమ్ । ధ్యాయంతి వాసుదేవాఖ్యం తమస్మి శరణం గతః ॥ 59.74 ॥
సర్వగం సర్వభూతం చ సర్వస్యాధారమీశ్వరమ్ । వాసుదేవం పరం బ్రహ్మ తమస్మి శరణం గతః ॥ 59.75 ॥
పరమాత్మానమవ్యక్తం యం ప్రయాంతి సుమేధసః । కర్మక్షయేఽక్షయం దేవం తమస్మి శరణం గతః ॥ 59.76 ॥
పుణ్యపాపవినిర్ముక్తా యం ప్రవిశ్య పునర్భవమ్ । న యోగినః ప్రాప్నువంతి తమస్మి శరణం గతః ॥ 59.77 ॥
బ్రహ్మ భూత్వా జగత్సర్వం సదేవాసురమానుషమ్ । యః సృజత్యచ్యుతో దేవస్తమస్మి శరణం గతః ॥ 59.78 ॥
బ్రహ్మత్వే యస్య వక్త్రేభ్యశ్చతుర్వేదమయం వపుః । ప్రభుః పురాతనో జజ్ఞే తమస్మి శరణం గతః ॥ 59.79 ॥
బ్రహ్మరూపధరం దేవం జగద్యోనిం జనార్దనమ్ । స్రష్టృత్వే సంస్థితం సృష్టౌ ప్రణతోఽస్మి సనాతనమ్ ॥ 59.80 ॥
స్రష్టా భూత్వా స్థితో యోగీ స్థితావసురసూదనః । తమాదిపురుషం విష్ణుం ప్రణతోఽస్మి జనార్దనమ్ ॥ 59.81 ॥
ధృతా మహీ హతా దైత్యాః పరిత్రాతాస్తథా సురాః । యేన తం విష్ణుమాద్యేశం ప్రణతోఽస్మి జనార్దనమ్ ॥ 59.82 ॥
యజ్ఞైర్యజంతి యం విప్రా యజ్ఞేశం యజ్ఞభావనమ్ । తం యజ్ఞపురుషం విష్ణుం ప్రణతోఽస్మి సనాతనమ్ ॥ 59.83 ॥
పాతాలవీథీభూతాను తథా లోకాన్ నిహంతి యః । తమంతపురుషం రుద్రం ప్రణతోఽస్మి సనాతనమ్ ॥ 59.84 ॥
సంభక్షయిత్వా సకలం యథాసృష్టమిదం జగత్ । యో వై నృత్యతి రుద్రాత్మా ప్రణతోఽస్మి జనార్దనమ్ ॥ 59.85 ॥
సురాసురాః పితృగణా యక్షగంధర్వరాక్షసాః । సంభూతా యస్య దేవస్య సర్వగం తం నమామ్యహమ్ ॥ 59.86 ॥
సమస్తదేవాః సకలా మనుష్యాణాం చ జాతయః । యస్యాంశభూతా దేవస్య సర్వగం తం నతోఽస్మ్యహమ్ ॥ 59.87 ॥
వృక్షగుల్మాదయో యస్య తథా పశుమృగాదయః । ఏకాంశభూతా దేవస్య సర్వగం తం నమామ్యహమ్ ॥ 59.88 ॥
యస్మాన్నాన్యత్ పరం కించిద్ యస్మిన్ సర్వం మహాత్మని । యః సర్వమధ్యగోఽనంతః సర్వగం తం నమామ్యహమ్ ॥ 59.89 ॥
యథా సర్వేషు భూతేషు గూఢోఽగ్నిరివ దారుషు । విష్ణురేవం తథా పాపం మమాశేషం ప్రణశ్యతు ॥ 59.90 ॥
యథా విష్ణుమయం సర్వం బ్రహ్మాది సచరాచరమ్ । యచ్చ జ్ఞానపరిచ్ఛేద్యం పాపం నశ్యతు మే తథా ॥ 59.91 ॥
శుభాశుభాని కర్మాణి రజఃసత్త్వతమాంసి చ । అనేకజన్మకర్మోత్థం పాపం నశ్యతు మే తథా ॥ 59.92 ॥
యన్నిశాయాం చ యత్ప్రాతర్యన్మధ్యాహ్నాపరాహ్ణయోః । సంధ్యయోశ్చ కృతం పాపం కర్మణా మనసా గిరా ॥ 59.93 ॥
యత్తిష్ఠతా యద్వ్రజతా యచ్చ శయ్యాగతేన మే । కృతం యదశుభం కర్మ కాయేన మనసా గిరా ॥ 59.94 ॥
అజ్ఞానతో జ్ఞానతో వా మదాచ్చలితమానసైః । తత్ క్షిప్రం విలయం యాతు వాసుదేవస్య కీర్తనాత్ ॥ 59.95 ॥
పరదారపరద్రవ్యవాంఛాద్రోహోద్భవం చ యత్ । పరపీడోద్భవాం నిందాం కుర్వతా యన్మహాత్మనామ్ ॥ 59.96 ॥
యచ్చ భోజ్యే తథా పేయే భక్ష్యే చోష్యే విలేహనే । తద్యాతు విలయం తోయే యథా లవణభాజనమ్ ॥ 59.97 ॥
యద్బాల్యే యచ్చ కౌమారే యత్పాపం యౌవనే మమ । వయఃపరిణతౌ యచ్చ యచ్చ జన్మాంతరే కృతమ్ ॥ 59.98 ॥
తన్నారాయణ గోవింద హరికృష్ణేశ కీర్తనాత్ । ప్రయాతు విలయం తోయే యథా లవణభాజనమ్ ॥ 59.99 ॥
విష్ణవే వాసుదేవాయ హరయే కేశవాయ చ । జనార్దనాయ కృష్ణాయ నమో భూయో నమో నమః ॥ 59.100 ॥
భవిష్యన్నరకఘ్నాయ నమః కంసవిఘాతినే । అరిష్టకేశిచాణూరదేవారిక్షయిణే నమః ॥ 59.101 ॥
కోఽన్యో బలేర్వంచయితా త్వామృతే వై భవిష్యతి । కోఽన్యో నాశయతి బలాద్దర్పం హైహయభూపతేః ॥ 59.102 ॥
కః కరిష్యత్యథాన్యో వై సాగరే సేతుబంధనమ్ । వధిష్యతి దశగ్రీవం కః సామాత్యపురఃసరమ్ ॥ 59.103 ॥
కస్త్వామృతేఽన్యో నందస్య గోకులే రతిమేష్యతి । ప్రలంబపూతనాదీనాం త్వామృతే మధుసూదన । నిహంతాప్యథవా శాస్తా దేవదేవ భవిష్యతి ॥ 59.104 ॥
జపన్నేవం నరః పుణ్యం వైష్ణవం ధర్మముత్తమమ్ । ఇష్టానిష్టప్రసంగేభ్యో జ్ఞానతోఽజ్ఞానతోఽపి వా ॥ 59.105 ॥
కృతం తేన తు యత్పాపం సప్తజన్మాంతరాణి వై । మహాపాతకసంజ్ఞం వా తథా చైవోపపాతకమ్ ॥ 59.106 ॥
యజ్ఞాదీని చ పుణ్యాని జపహోమవ్రతాని చ । నాశయేద్యోగినాం సర్వమామపాత్రమివాంభసి ॥ 59.107 ॥
నరః సంవత్సరం పూర్ణం తిలపాత్రాణి షోడశ । అహన్యహని యో దద్యాత్ పఠత్యేతచ్చ తత్సమమ్ ॥ 59.108 ॥
అవిలుప్తబ్రహ్మచర్యం సంప్రాప్య స్మరణం హరేః । విష్ణులోకమవాప్నోతి సత్యమేతన్మయోదితమ్ ॥ 59.109 ॥
యథైతత్సత్యముక్తం మే న హ్యల్పమపి మే మృషా । రాక్షసస్త్రస్తసర్వాంగం తథా మామేష ముంచతు ॥ 59.110 ॥
పులస్త్య ఉవాచ
ఏవముచ్చారితే తేన ముక్తో విప్రస్తు రక్షసా ।
అకామేన ద్విజో భూయస్తమాహ రజనీచరమ్ ॥ 59.111 ॥బ్రాహ్మణ ఉవాచ
ఏతద్భద్ర మయా ఖ్యాతం తవ పాతకనాశనమ్ ।
విష్ణోః సారస్వతం స్తోత్రం యజ్జగాద సరస్వతీ ॥ 59.112 ॥హుతాశనేన ప్రహితా మమ జిహ్వాగ్రసంస్థితా । జగాదైనం స్తవం విష్ణోః సర్వేషాం చోపశాంతిదమ్ ॥ 59.113 ॥
అనేనైవ జగన్నాథం త్వమారాధయ కేశవమ్ । తతః శాపాపనోదం తు స్తుతే లప్స్యసి కేశవే ॥ 59.114 ॥
అహర్నిశం హృషీకేశం స్తవేనానేన రాక్షస । స్తుహి భక్తిం దృఢాం కృత్వా తతః పాపాద్విమోక్ష్యసే ॥ 59.115 ॥
స్తుతో హి సర్వపాపాని నాశయిష్యత్యసంశయమ్ । స్తుతో హి భక్త్యా నౄణాం వై సర్వపాపహరో హరిః ॥ 59.116 ॥
పులస్త్య ఉవాచ
తతః ప్రణమ్య తం విప్రం ప్రసాద్య స నిశాచరః । తదైవ తపసే శ్రీమాన్ శాలగ్రామమగాద్వశీ ॥ 59.117 ॥
అహర్నిశం స ఏవైనం జపన్ సారస్వతం స్తవమ్ । దేవక్రియారతిర్భూత్వా తపస్తేపే నిశాచరః ॥ 59.118 ॥
సమారాధ్య జగన్నాథం స తత్ర పురుషోత్తమమ్ । సర్వపాపవినిర్ముక్తో విష్ణులోకమవాప్తవాన్ ॥ 59.119 ॥
ఏతత్తే కథితం బ్రహ్మన్ విష్ణోః సారస్వతం స్తవమ్ । విప్రవక్త్రస్థయా సమ్యక్ సరస్వత్యా సమీరితమ్ ॥ 59.120 ॥
య ఏతత్ పరమం స్తోత్రం వాసుదేవస్య మానవః । పఠిష్యతి స సర్వేభ్యః పాపేభ్యో మోక్షమాప్స్యతి ॥ 59.121 ॥
॥ ఇతి శ్రీ వామనపురాణే ఏకోనషష్టితమోఽధ్యాయః ॥
