జగదీశ సుధీశ భవేశ విభో పరమేశ పరాత్పర పూత పితః !
ప్రణతం పతితం హతబుద్ధిబలం జనతారణ తారయ తాపితకమ్ !!
గుణహీనసుదీనమలీనమతిం త్వయి పాతరి దాతరి చాపరతిమ్ !
తమసా రజసా వృతవృత్తిమిమం జనతారణ తారయ తాపితకమ్ !!
మమ జీవన మీనమిమం పతితం మరుఘోరభువీహ సువీహమహో !
కరుణాబ్ధిచలోమిర్జలానయనం జనతారణ తారయ తాపితకమ్ !!
భవవారణ కారణ కర్మతతౌ భవసిన్ధుజలే శివ మగ్నమతః !
కరుణాఞ్చ సమర్ప్య తరిం త్వరితం జనతారణ తారయ తాపితకమ్
!!
అతినాశ్య జనుర్మమ పుణ్యరుచే దురితౌఘభరైః పరిపూర్ణభువః !
సుజఘణ్యమగణ్య మపుణ్యరుచిం జనతారణ తారయ తాపితకమ్ !!
భవకారక నారకహారక హే భవతారక పాతకదారక హే !
హర శఙ్కర కిఙ్కరకర్మచయం జనతారణ తారయ తాపితకమ్ !!
తృషితఞ్చరమస్మి సుధాం హిత మే ఽచ్యుత చిన్మయ దేహి వదాన్యవర !
అతిమోహవశేన వినష్టకృతం జనతారణ తారయ తాపితకమ్ !!
ప్రణమామి నమామి నమామి భవం భవజన్మకృతిప్రణిషూదనకమ్ !
గుణహీనమనన్తమితం శరణం జనతారణ తారయ తాపితకమ్ !!
ఇతి పరమేశ్వరస్తోత్రం సమ్పూర్ణమ్
No comments:
Post a Comment